بہاولپور اسٹیٹ فورسز کی پاک فوج میں ضم ہونے والی عباسیہ بٹالین (موجودہ بلوچ رجمنٹ) کے لیفٹیننٹ کرنل عرفان اکبر، دیگر افسران اور جوانوں نے امیرِ بہاولپور نواب صلاح الدین عباسی کی والدہ محترمہ کے انتقال پر گہرے دکھ اور افسوس کا اظہار کیا ہے۔
اس سلسلے میں بٹالین کے ایک نمائندے نے لاہور میں ڈیفنس ہاؤسنگ اتھارٹی میں واقع نواب صاحب کی رہائش گاہ پر جا کر تعزیتی مکتوب پیش کیا۔ خط میں مرحومہ ہر ہائنس بیگم صاحبہ، اہلیہ امیرِ بہاولپور نواب محمد عباس خان عباسی، کے درجات کی بلندی اور مغفرت کے لیے دعا کی گئی۔
تفصیلات کے مطابق دو روز قبل لیفٹیننٹ کرنل عرفان اکبر نے ولی عہد پرنس بہاول عباس عباسی سے ٹیلی فون پر رابطہ کر کے صادق گڑھ پیلس میں تعزیت کے لیے حاضری کی خواہش ظاہر کی تھی، تاہم انہیں آگاہ کیا گیا کہ وہ لاہور منتقل ہو چکے ہیں۔ اس کے بعد بٹالین کی جانب سے ایک نمائندہ لاہور روانہ کیا گیا۔
نمائندے نے نواب صاحب کو بتایا کہ بٹالین اس وقت ایکسرسائز کے سلسلے میں صحرائی علاقے میں مصروف تھی اور ہیڈکوارٹر واپسی پر انہیں اس افسوسناک خبر کا علم ہوا۔
واضح رہے کہ امیرِ بہاولپور نواب محمد عباس خان عباسی مرحوم اور موجودہ امیر نواب صلاح الدین عباسی، بہاولپور اسٹیٹ فورسز سے پاک فوج میں ضم ہونے والی مختلف بٹالینز کی تقریبات میں وقتاً فوقتاً شرکت کرتے رہے ہیں۔