نیویارک / اسلام آباد:
اقوامِ متحدہ کے سیکریٹری جنرل انتونیو گوتریس نے اسلام آباد میں ایک مسجد میں عبادت کے لیے جمع نمازیوں پر ہونے والے حملے کی سخت ترین الفاظ میں مذمت کی ہے۔
اقوامِ متحدہ کے سیکریٹری جنرل کے نائب ترجمان فرحان حق کی جانب سے جاری بیان میں کہا گیا ہے کہ شہریوں اور عبادت گاہوں کو نشانہ بنانا ناقابلِ قبول ہے اور اس بزدلانہ کارروائی کے ذمہ داران کو قانون کے مطابق انصاف کے کٹہرے میں لایا جانا چاہیے۔
بیان میں کہا گیا کہ سیکریٹری جنرل نے حملے میں جاں بحق افراد کے اہلِ خانہ سے دلی تعزیت کا اظہار کیا اور زخمیوں کی جلد اور مکمل صحت یابی کے لیے نیک تمناؤں کا اظہار کیا ہے۔
اقوامِ متحدہ کے سیکریٹری جنرل نے دہشت گردی اور پرتشدد انتہا پسندی کے خلاف پاکستان کی حکومت اور عوام کی کوششوں کے ساتھ مکمل یکجہتی کا اعادہ کرتے ہوئے کہا کہ اقوامِ متحدہ اس مشکل گھڑی میں پاکستان کے ساتھ کھڑی ہے۔