نریندر مودی نے اپنے سوشل میڈیا پلیٹ فارم ایکس (X) پر جاری بیان میں کہا کہ آج اپنے عزیز دوست ڈونلڈ ٹرمپ سے گفتگو کرکے خوشی ہوئی۔ انہوں نے کہا کہ میڈ اِن انڈیا مصنوعات پر ٹیرف کم ہو کر 18 فیصد ہونے پر انہیں بے حد مسرت ہے، اور اس شاندار اعلان پر وہ بھارت کے 1.4 ارب عوام کی جانب سے صدر ٹرمپ کے تہہ دل سے شکر گزار ہیں۔
نریندر مودی کا کہنا تھا کہ جب دنیا کی دو بڑی معیشتیں اور دنیا کی سب سے بڑی جمہوریتیں مل کر کام کرتی ہیں تو اس کے ثمرات عوام تک پہنچتے ہیں اور باہمی مفاد پر مبنی تعاون کے بے پناہ مواقع پیدا ہوتے ہیں۔ انہوں نے مزید کہا کہ صدر ٹرمپ کی قیادت عالمی امن، استحکام اور خوشحالی کے لیے نہایت اہم ہے، اور بھارت امن کے لیے ان کی کوششوں کی مکمل حمایت کرتا ہے۔
وزیرِاعظم مودی نے کہا کہ وہ صدر ٹرمپ کے ساتھ قریبی طور پر کام کرنے کے منتظر ہیں تاکہ دونوں ممالک کے درمیان شراکت داری کو نئی اور بے مثال بلندیوں تک لے جایا جا سکے۔