پیرس
فرانس کے دارالحکومت پیرس میں پاکستانی نژاد شہری علی اکبر نے ایک منفرد مثال قائم کر دی۔ راولپنڈی سے تعلق رکھنے والے علی اکبر کو فرانس کے اعلیٰ سول اعزاز National Order of Merit سے نوازا گیا۔ یہ اعزاز فرانس کے صدر Emmanuel Macron نے ایلیسی پیلس میں منعقدہ ایک پروقار تقریب کے دوران دیا۔
علی اکبر گزشتہ پچاس برس سے پیرس کی سڑکوں پر اخبار فروخت کر رہے ہیں۔ اپنی انتھک محنت، خوش اخلاقی اور منفرد انداز کے باعث وہ مقامی لوگوں میں بے حد مقبول ہیں اور فرانسیسی معاشرے میں ایک مثبت پہچان بن چکے ہیں۔ تقریب سے خطاب کرتے ہوئے صدر میکرون نے کہا کہ علی اکبر فرانس کے پریس کی آواز ہیں، جو خبروں کو عوام تک پہنچانے کے ساتھ ساتھ معاشرے میں انسانی رشتوں کی گرمجوشی کو بھی زندہ رکھتے ہیں۔
صدر میکرون نے علی اکبر کی خدمات کو سراہتے ہوئے کہا کہ ایسے افراد معاشرے کے خاموش ہیرو ہوتے ہیں، جو اپنی محنت اور لگن سے دوسروں کے لیے مثال بن جاتے ہیں۔ اس موقع پر علی اکبر کے اہلِ خانہ بھی تقریب میں موجود تھے۔
یہ اعزاز نہ صرف علی اکبر بلکہ فرانس میں مقیم پوری پاکستانی کمیونٹی کے لیے باعثِ فخر قرار دیا جا رہا ہے۔ پیرس کی گلیوں سے Élysée Palace تک کا یہ سفر اس بات کا ثبوت ہے کہ محنت، استقامت اور خلوص کبھی رائیگاں نہیں جاتے۔