یورپی یونین برائے پاکستان کے اعلیٰ سطحی وفد، فرنٹیکس کے پاکستان میں لائژن آفیسر، ہنگری کے سفارت خانے کے نمائندے اور آئی سی ایم پی ڈی کے نمائندے نے سیالکوٹ انٹرنیشنل ایئرپورٹ کا دورہ کیا۔ دورے کے دوران وفد کو ایف آئی اے امیگریشن سیالکوٹ ایئرپورٹ کی کارکردگی، نظامِ کار اور کامیابیوں پر جامع بریفنگ دی گئی، جس میں گزشتہ پانچ ماہ کے دوران ہونے والی پیش رفت پر خصوصی توجہ دی گئی۔
بریفنگ میں غیر قانونی ہجرت کی روک تھام کے لیے اٹھائے گئے اقدامات، رسک انڈیکیٹرز کے مؤثر نفاذ، بہتر پروفائلنگ میکانزم اور سیکنڈ لائن بارڈر کنٹرول آفس کے بہترین استعمال سے متعلق امور شامل تھے۔ مزید برآں، زونل سطح اور ایئرپورٹ پر قائم پری ڈیپارچر سہولیات سے بھی آگاہ کیا گیا، جن کا مقصد بارڈر مینجمنٹ کو مضبوط بنانا، آپریشنل کارکردگی میں بہتری اور مسافروں کے لیے دوستانہ ماحول فراہم کرنا ہے۔ وفد نے سیالکوٹ انٹرنیشنل ایئرپورٹ پر مؤثر، محفوظ اور مضبوط بارڈر کنٹرول کے لیے ایف آئی اے کی پیشہ ورانہ مہارت اور عزم کو سراہا۔