پاکپتن کے نواحی علاقے بستی بگے شاہ میں انسانیت سوز واقعہ پیش آیا، جہاں ایک اوباش ملزم نے شہری کو اغواء کرکے بدترین تشدد کا نشانہ بنایا۔
پولیس کے مطابق ملزم نے مغوی کو برہنہ کرکے اپنی بیوی کے ہمراہ ڈنڈوں سے تشدد کیا اور اس دوران تشدد کی ویڈیو بنا کر سوشل میڈیا پلیٹ فارم ٹک ٹاک پر اپ لوڈ کر دی۔ واقعے کی اطلاع ملتے ہی پولیس نے فوری کارروائی کرتے ہوئے ملزم اور اس کی بیوی کو گرفتار کر لیا۔
واقعے کا نوٹس لیتے ہوئے جاوید اقبال چدھڑ نے کہا ہے کہ کسی کو بھی قانون ہاتھ میں لینے کی ہرگز اجازت نہیں دی جا سکتی۔ انہوں نے واضح کیا کہ عوام الناس کے جان و مال کا تحفظ پاکپتن پولیس کی اولین ترجیح ہے۔
پولیس کے مطابق متاثرہ شخص کی مدعیت میں مقدمہ درج کر لیا گیا ہے جبکہ گرفتار ملزمان کے خلاف قانون کے مطابق سخت کارروائی عمل میں لائی جا رہی ہے۔ڈی پی او جاوید اقبال چدھڑ نے مزید کہا کہ ایسے واقعات میں ملوث عناصر کے ساتھ کوئی رعایت نہیں برتی جائے گی اور قانون کی عملداری ہر صورت یقینی بنائی جائے گی۔