مٹیاری
حروں کے روحانی پیشوا اور پاکستان مسلم لیگ فنکشنل کے سربراہ پیر پگارہ نے کہا ہے کہ پاکستان ایک مضبوط، مستحکم اور امن پسند ملک ہے، جہاں پاک فوج کی عظیم قربانیوں، پیشہ ورانہ صلاحیتوں اور انتھک محنت کے باعث دہشت گردی پر مؤثر قابو پا لیا گیا ہے اور قومی وحدت مضبوط بنیادوں پر قائم ہو چکی ہے۔
مٹیاری کے نواحی علاقے میں فقیر خلیفہ قادر بخش اور ایڈووکیٹ محرم ابڑو کی جانب سے دی گئی دعوت کے موقع پر مریدین سے خطاب کرتے ہوئے پیر پگارہ نے کہا کہ پاک فوج ملک کی سلامتی، خودمختاری اور سرحدوں کے تحفظ کی ضامن ہے اور پوری قوم کو اپنی بہادر افواج پر فخر ہے۔
انہوں نے کہا کہ پاکستان مسلم لیگ فنکشنل ہر مشکل گھڑی میں پاک فوج کے شانہ بشانہ کھڑی رہی ہے اور آئندہ بھی ملکی دفاع اور استحکام کے لیے افواجِ پاکستان کی مکمل حمایت جاری رکھے گی۔ پیر پگارہ کا کہنا تھا کہ پاکستان بے شمار قربانیوں، جدوجہد اور شہداء کے خون کی بدولت قائم ہوا ہے، جس کی حفاظت ہم سب کی مشترکہ ذمہ داری ہے۔
انہوں نے مریدین کو تلقین کی کہ وہ ملک کی ترقی، استحکام اور پاک فوج کی کامیابیوں کے لیے خصوصی دعائیں کریں۔ اس موقع پر انہوں نے والدین کو ہدایت کی کہ وہ اپنے بچوں کو تعلیم کے زیور سے آراستہ کریں اور ان کی اخلاقی تربیت پر خصوصی توجہ دیں، کیونکہ تعلیم ہی جہالت، انتہا پسندی اور تاریکی کے خاتمے کا مؤثر ذریعہ ہے۔
آخر میں پیر پگارہ نے مریدین کو نماز کی پابندی، ذکرِ الٰہی اور درود شریف کا ورد کرنے کی تلقین کرتے ہوئے کہا کہ انہی اعمال سے دنیا و آخرت کی کامیابی، قومی یکجہتی اور معاشرتی امن ممکن ہے۔