قصور میں چار سالہ معصوم بچی کے ساتھ پیش آنے والے درندگی کے افسوسناک واقعے نے پورے علاقے کو سوگوار کر دیا ہے۔ واقعے کے بعد متاثرہ بچی کی حالت تشویشناک ہونے پر اسے فوری طور پر لاہور جنرل ہسپتال منتقل کر دیا گیا ہے، جہاں ماہر ڈاکٹروں کی ٹیم اس کا علاج کر رہی ہے۔
واقعے کا صوبائی وزیرِ قانون رانا محمد اقبال خان نے فوری نوٹس لیتے ہوئے ہسپتال انتظامیہ کو ہدایت کی ہے کہ متاثرہ بچی کو ہر ممکن اور بہترین طبی سہولیات فراہم کی جائیں۔ وزیرِ قانون نے ڈی پی او قصور سے واقعے کی فوری رپورٹ بھی طلب کر لی ہے۔
رانا محمد اقبال خان نے پولیس کو ملزمان کی فوری گرفتاری اور ان کے خلاف سخت قانونی کارروائی کی ہدایت کرتے ہوئے کہا ہے کہ متاثرہ بچی کو مکمل تحفظ فراہم کیا جائے۔ ان کا کہنا تھا کہ معصوم بچوں کے ساتھ ظلم کرنے والے انسانیت کے دشمن ہیں اور ایسے درندے کسی رعایت کے مستحق نہیں۔
صوبائی وزیرِ قانون نے واضح کیا کہ مجرموں کو قانون کے شکنجے میں لا کر عبرتناک سزا دلوائی جائے گی تاکہ آئندہ کوئی بھی ایسے گھناؤنے جرائم کرنے کی جرات نہ کر سکے