پاراچنار:
قومی اسمبلی میں ضلع کرم سے منتخب رکنِ قومی اسمبلی اور مجلس وحدت المسلمین کے پارلیمانی لیڈر انجینئر حمید حسین نے آج اسلام آباد میں سینیٹ میں اپوزیشن لیڈر علامہ راجہ ناصر عباس جعفری سے ملاقات کی۔ ملاقات میں ضلع کرم اور خیبر کے مختلف علاقوں میں جاری فوجی آپریشن، اس کے نتیجے میں ہونے والی نقل مکانی اور متاثرہ افراد کو درپیش مشکلات پر تفصیلی تبادلۂ خیال کیا گیا۔
اس موقع پر قبائلی اضلاع میں عوام کو درپیش مسائل پر تشویش کا اظہار کرتے ہوئے علامہ راجہ ناصر عباس جعفری نے انجینئر حمید حسین کو ہدایت کی کہ وہ فوری طور پر ضلع کرم کا دورہ کریں اور عارضی کیمپوں میں مقیم متاثرہ خاندانوں سے ملاقات کر کے ان کے مسائل کے حل کے لیے ضروری اقدامات اٹھائیں۔
واضح رہے کہ وسطی کرم اور وادی تیراہ میں دہشت گردوں کے خلاف جاری آپریشن کے باعث ہزاروں افراد بے گھر ہو کر عارضی کیمپوں میں منتقل ہو چکے ہیں، جہاں شدید سردی اور برفباری کے باعث انہیں سخت مشکلات کا سامنا ہے۔